أيوب زمانه

طب كويس ماشفناش الحزب الوطنى والإخوان وهمه بيستفردوا بساحة العمل الطلابى بإستغلال ظروفهم و إبهارهم وإبتزاز عواطفهم بس شفناهم وهما بيتقاسموا على إتحاد الطلاب  وبانت الفضايح يعنى الحكومة بسلامتها عمالة تطنطن فى مواضيع إن الجامعة مكان للعلم بس (العلم مقطع بعضه قوى) قال يعنى جامعاتنا مش فى ذيل الترتيب العالمى ولا الطلا ب مابيخرجوش من الجامعة زى مادخلوها ولا الدكاترة بيسرقوا الأبحاث من الباحثين الشباب ومن بعض ومن المراجع الأجنبية

المهم الحكومة على حس الفيلم ده منعت أى نشاط طلابى فى الجامعة فى المرحلة اللى بيهتم الشاب فيها بالإنخراط فى جماعة إى جماعة وبكدة يتعلم السلبية علشان لما يخش عالتجنيد يبقى جاهز إنه يتكلم عن نفسه وبس ويطلع من الجيش بقه زى مالنظام عايزة بالظبط يعنى مايتكلمش والحومة منين ماتحطه يقعد

طب يعملوا إيه علشان يوصلوا لكده مفيش مانع الإخوان يبقى لهم نصيب فى البيعة بس بشرط يلزموا حدودهم يعنى يشغلوا الطلبة بفلسطين شوية والشيشان شوية واهو كله طق حنك يعنى لو حد حرق العلم الإسرائيلى واللا الروسى واللا حت الإثيوبى فيه حاجة حتتغير أهم بيهووا عن نفسهم أحسن مايتكلموا فى قضايا البلد الحقيقية

بس دوام الحال من المحال والإخوان مش راضيين بنصيبهم وفهموا إن من حقهم طالما الأمن إتحول لميلشيات تابعة للحزب الوطنى مافيش مانع يلموا كام طالب ويدربوهم على القتال ويعملوا بيهم عرض علشان يقولوا إحنا هنا ودى كانت غلطتهم التاريخية لأن عمرهم ماقدروا حجمهم الحقيقى وكل اللى عملته الحكومة إنها سابت  الناس تتفرج عليهم علشان تبقى معذورة لما تجيبهم من قفاهم

وهيه دى القصة لاهى قصة إتحاد طلاب حر الإخوان عايزينه ولا هى حكاية  الشرعية ولا حتى أمن الجامعة

زى الحكومة مابتقول طب كانت فين الحكومة من كام سنة لما كان الإخوان بينظموا نشاطاتهم فى الجامعة

كل سنة وإنتم طيبين

نفس اللعبة بين الإخوان المسلمين والنظام الحاكم فى كل من مصر وقطاع غزة ..الصراع على ماتبقى من وطن سواء كان ماتبقى من أشلاء فلسطين أو حطام مصر

ماذا فعل الإخوان المسلمون فى مصر بعد إنتخابهم فى مجلس الشعب ما الذى أضافوه لاشىء حقيقى ومع ذلك فقد صدقوا أكذوبة إنهم فصيل معارضة وطنى وظنوا أن ذلك يبرر لهم إنشاء ميليشات من البلطجية أشبة بمجموعات (الباسيج) والتى مهمتها تحطيم عظام أى معارضة لنظام القمع الدينى فى إيران وسحل المتظاهرين فى الشوارع

المهم إن النظام ليس فى نيته حقاً التعامل بجدية مع التهديد الفاشى الذى يمثله الإخوان لكل مكتسبات المجتمع المصرى كل ما فى الأمر لعبة شد الحبل بين النظام والإخوان ليس فى مصلحة أحد هما أن تنتهى قريباً وكان الضحية هم طلاب جامعيون لم يجدوا مايمكن الإنتماء إليه فى مجتمع مسطول لايعلم يمينه من شماله سوى ميليشات فاشية بإختصار كل أراده هؤلاء الشباب أن يكونوا جزءاً من شىء ما

الأمر مختلف قليلاً فى غزة الصراع بين حماس والتوانسة (العائدون مع عرفات ) على أشده  والغنيمة ليست إلا أشلاء فلسطين حتى إن الأمر أشبه بغرابين يتنازعان بقايا جيفة وشروط اللعبة هنا تختلف حيث إن أحدهما لايعنيه سوى إقصاء الآخر تماما ولو إحترقت غزة لكى ينال نصيبه فى العمولات والسمسرة فى السوق المسمى بالجامعة العربية

ومايزال اللصوص يتنازعون أيهم أحق بنبش القبر

أنا كنت من فترة قريبة كدة إتكلمت عن إنتخابات النقابات العمالية بس الظاهر إن الرد من العمال جاه بسرعة الحقيقة أنا كنت متشائم شوية بعد الإنتخابات الفضيحة بس أنا دلوقت مطالب بإعتذار لعمال مصر عامة ولعمال المحلة بصفة خاصة بعد الإضراب اللى عملوه فى المحلة يمكن كتير ماهتمش باللى حصل لأن المطالب فعلاً كانت تخص عمال المصنع (شهرين أرباح) بس العمال كانوا فعلاً على مستوى كبير من الوعى :رفش النقابة الجايه بإنتخابات مزورة والوعى والتحذير من خصخصة الشركة ورفض الفساد اللى بيمارسه مجلس الإدارة وإنا رأيى إن الإضراب ده (17000عامل فى أربع أيام) كان أبلغ رسالة  للحكومة فى السنتين اللى فاتوا من غير أى مبالغة بالعربى العمال مش نايمين زى ما احنا كنا فاهمين وكانوا على مستوى عالى من التنظيم لدرجة إن العاملات جابوا ولادهم معاهم فى المصنع حتى إن الحكومة ماكانش قدامها حل غير إنها تديهم أجازة عشان تفض الإضراب وفى الآخر إنتصر العمال ووصلوا لمطالبهم مع التهديد بإن الإضراب حيرجع تانى لو الحكومة منفذتش اللى وعدت بيه

أما بقى عن الخصخة فاللى خلى 17000عامل يعملوا إضراب علشان شهرين مكافأة ممكن يخلى ال40000عامل كلهم يقفوا ضد أى تحرك لخصخصة المصنع وتسريح العمال

أنا مش ببالغ أبداً فى كلامى ده وأنا متأكد إن دى مش آخر حاجة يقدر عليها عمال مصر

أعتقد إن تحرير النقابات أصبح قريب قوى

أكيد فيه أخبار حلوة بتقوللنا إن الشارع صحى وفيه تحركات شعبية جديدة بعيدة عن النظام الرسمى يعنى مثلاً لما ينشر مالك  خبر إنطلاق مهرجان القاهرة للسينما المستقلة بالتزامن مع المهرجان الرسمى إياه بالذمة ده مش خبر حلو ولما ينشر المدون المعروف وائل عباس  خبر زى القبض على مجموعة من مماليك حبيب العادلى لتهمة التعذيب بعد الحملة اللى قام بيها هوه وعدد من المدونين معاه مش ده مهم برضه ويعد إنتصار للصحافة المستقلة

وحملة جمع التوقيعات لإتحاد العاطلين عن العمل علشان المؤتمر الـتأسيسى فى يناير مش ده خبر مهم وبيدل على إن الناس حتبدأ تاخد زمام المبادرة بعيد خالص عن أحزاب المعارضة الله يرحمها

تحديث: أحيى المواطن محمد على السائق الى إتعرض للتعذيب وإمتهنت كرامته فى قسم بولاق على شجاعته وإستمراره فى الإجراءات القانونية ضد المجرمين

دلوقت همه اللى لازم يخافوا لأن الناس مابقتش تخاف زى الأول